090 評粵語向廣州音嘅內聚

090 評粵語向廣州音嘅內聚

廣州北郊嘅江村講嘅係帶有少少音變嘅鄉郊廣州話！我就有幾個江村土生嘅同學，自細喺江村大，佢哋講嘅話不知幾白，同廣州市區嘅標準廣州話僅係有的咁朵音異，兩者嘅通話係絕對唔成任何問題嘅！

喺同一個班，亦有唔少嚟自花縣花山，從化旗桿嘅同窗，佢哋同鄉彼此間交流都係用好字正腔圓嘅廣州話，同外鄉嘅同學交流，就用佢哋嗰啲帶有少少蕃薯味嘅廣州話，跟本唔存在溝通唔到嘅現象！

至於江門人，佢哋講嘅係四邑味好重嘅廣州話，廣州人會覺得江門人噏啲廣州話別有風味，但係絕對唔會去到雞同鴨講嘅地步！我嘅父祖所講嘅就係帶有四邑味道嘅廣州話，同標準廣州話差別唔大嘅！

百色話，南寧話，桂平話，梧州話，肇慶話，廣州話，都係同一條西江黃金水道過去嘅，彼此間雖然相隔千里，但係音變唔大。古時大粵內部嘅交往溝通，喺以水運為尊，陸運為輔，一條西江黃金水道，係大粵人流，物流，文化流嘅主幹道，係聯結大粵各方嘅命脈！喺佢幹流流經嘅地方，普遍使用廣州話，鄰近地域嘅鄉音，亦普遍向西江幹流上高大嘅廣州話據點（田邕潯梧端廣）靠近。喺北江，連江，綏江，賀江幹流一帶，亦有相近嘅情形出現，廣州話作為粵語嘅代表音，係喺古時水運為尊嘅時代就經已確立嘅，粵語內部嘅靠攏，並唔係好似某啲“人”所講嘅靠現代資訊傳播嘅發達，靠香港港產文化嘅助推先至得以實現！粵語向廣州音嘅內聚，早喺千年前就經已啟動，並沿著粵江水系持續噉進行，直至當代。大粵南路嘅四邑，高陽，吳化，廉欽，鬱林，三羅，由於同粵江水系並唔相通，所以同粵海片相比，喺音系上高保持著較大嘅歧異性，不過將呢種歧異，擺喺粵語同其它語言嘅差別面前，係蚊同牛比！