粵右激論系列：236 政治預估地圖作品：“東亞大陸新格局推想”解讀 順覆大粵民進社同志嘅疑惑

粵右激論系列：236 政治預估地圖作品：“東亞大陸新格局推想”解讀 順覆大粵民進社同志嘅疑惑


首先多謝大粵民進社嘅同志用心研判鄙人未全部完成嘅政治預估地圖作品：“東亞大陸新格局推想”，兼且提出新嘅觀點，顯然，噉有助於呢個論題更深入嘅探討。

喺呢套未全部完成嘅東亞大陸新格局組圖裡頭，第一圖：支那最大裂分！同其餘嘅第二圖至第六圖係冇關聯嘅。第一圖所揭示嘅，僅僅係支那本土最大化裂分散離嗰陣所呈現嘅境況，佢可以話畀我哋知，支那裡頭原嚟有咁多地理同文化片區可以獨立自成一體，支那原嚟可以散成噉！豈止七塊？！不過，呢種最大化裂散係冇可能喺同一時間裡頭達至嘅，所以，呢幅圖係概念同理想圖嚟。

由第二圖開始，直至第六圖，至係我對支裂實質進程嘅推想。所以，喺第二圖嘅名稱裡面，我特意加注咗“支那裂分第一階段”嘅字樣，第三至第六圖類推，分別推示支裂嘅第二至第五個階段。

第二圖：支那裂分第一階段--邊疆分離！；第三圖：支那裂分第二階段--深化裂分！；第四圖：支那裂分第三階段--南支分離！；經已喺半年幾前喺大粵民國臨府論壇首次發表，至於第五圖：支那裂分第四階段--勢力重塑！同第六圖：支那裂分第五階段--十雄裂支！，腹稿其實經已喺半年前經已有，不過礙於個人凡務，遲遲未有完成。

我對支裂實質進程嘅推想，係漸進式支裂，喺第二至第六圖嘅圖名裡頭我經已標示得好清晰明瞭，我唔認為支那可以瞬間崩解。呢度要搞清楚嘅係：支共政權可能會瞬間崩解，但係要支那瞬間崩解成五六十塊，係絕無可能。支那，尤其係北支那，佢內部的確係有好大嘅同一性，不過喺南支那，尤其係靠近粵、閩、吳嘅邊境省份，區域間嘅歧異係顯而易見嘅。

我認同一樣嘢，就係：對支那漸進潛行式嘅蠶食，比瞬間摧毀佢可以更持久噉改變東亞大陸嘅傳統政治地理。

所謂東亞大陸嘅漢撈有根深蒂固嘅大一統思想，呢啲其實係啲撈自己成日噏畀自己聽嘅啫，支那而家係統一狀態，冇理由唔宣傳佢過往係幾咁“統一”，其實祗要支那一散，各據一方嘅山大王自然唔會有興致仲講乜一統，睇睇而家嘅拉美同阿拉伯諸國，宣傳自己嘅獨特性要遠遠多過大家嘅一致性。

所謂嘅支那大一統，係植根喺古典世紀同中世紀嘅農業社會，同漢字漢文一體化嘅基礎之上嘅，家陣係工業化新世代，普世民主，民智祇會越嚟越開通，而唔係相反，支那嘅漢撈冇可能唔變，亦都唔到佢哋唔變。

不過，支裂嘅進程我唔認為係一馬平川嘅，個中必有嚟自支那嘅反制。喺第二圖，支裂嘅第一階段，係邊疆各省以現行省界作整體省域分離，邊疆各省按原省區獨立成國，噉好易理解，當代幾乎所有新政治實體從原母政治實體分離，都會繼承原母政治實體內部所原有嘅彼此間嘅行政劃界。

對於邊疆各省嘅分離，支那必有反制，或者摧毀呢種分離，或者以牙還牙，摧毀可以係直接嘅，亦可以採取先削弱後吞食嘅方式嚟進行，妳裂我我咪嚟裂返妳囉，今日俄國對格魯吉亞以牙還牙式嘅報復，他日支那必會認真參詳。於是，喺第三圖，支裂嘅第二階段，會出現已分離新國作進一步深化裂分嘅跡象，呢陣嘅國界走勢會同民族分佈嘅實際界線相當吻合，唔少單一民族國家嘅雛型開始凸露。不過，支那喺反制嘅同時，自身亦必受拖累，喺方音繁雜嘅南支那，顯然會更易受到呢股“單一民族國家、單一民族邦、單一語言邦”獨立思潮嘅強力波及，祗要粵、閩、臺、吳、滿、蒙、東土、圖博從中加以啟導挑動，集聚喺南支那嘅苗、瑤、侗、巴、湘、贛、哎、川、徽、淮諸族必定會群起騷動，支那為避免情勢失控，喺呢啲地方設立一系列嘅民族自治省幾率係好高嘅。

大粵民進社嘅同志成日都凝住支那裂分之後好快就會有統合，唔通呢種情況喺新生嘅東亞中亞東北亞環支那邊緣地帶各國就冇機會發生？答案顯然係否定嘅。南支那呢一系列民族自治省嘅建立，唔單祇喺地理上將粵、閩、吳同支那核心本土北支那直接阻隔，仲必定會有效噉遲滯、抵銷支那對粵、閩、吳嘅繼續削裂，從而為佢哋嘅實力回復同之後嘅各自域內重新統合贏得時間，喺區域一體化同外負支那重壓嘅情勢底下，各國間重新聚合嘅機會會大增，尤其係喺遠離北支那嘅南方。

唔單祇噉，世居喺南支那嘅非漢同偽漢（湘、贛、哎、川、徽、淮）諸族，隨著屬於佢哋自己嘅民族自治省嘅創建，佢哋自身嘅民族覺醒運動必然會有長足進展，喺粵、閩、臺、吳、滿、蒙、東土、圖博嘅直接同間接支持下底，佢哋必定會努力尋求自由，其結果，就係第四圖：支裂嘅第三階段--南支分離嚟喇。

我對支裂實質進程嘅構想，就係一個東亞中亞東北亞環支那邊緣諸國脅多方外力漸行裂支嘅路線圖。講真，粵、臺、閩、吳、圖博、東土、蒙、滿洲若然唔借外力，單靠自身力量，要瓜分支那本土係有相當難度嘅，但係，一但加入美、日、韓、俄、印度、印尼、越南、土耳其、澳洲嘅因素，形勢就會截然唔同，到時有咁多隻手岔落支那度，佢想唔散都好難，散咗之後，成個東亞大陸各方勢力錯縱複雜，某啲漢撈野心家想“統一”？邊有咁易！

我對支那嘅終極裂分：十雄裂支之後嘅形勢係噉睇嘅：粵、臺、閩、吳、圖博、東土、蒙、滿洲、日、韓十雄要脅美印歐俄澳土嘅外力共伐支那，滅支之後十雄各自分區佔領支那，各方喺各自嘅佔領區裡頭扶植一個至N個獨立嘅衛星國。

喺呢啲由十雄實質控制嘅衛星國裡頭，除咗要厲行議會民主，仲要全力推動各國各自嘅獨特性宣傳，同厲行去支那化去漢化嘅實質舉措：要宣傳佢哋經已係乜國人物國人乜族人物族人而唔再係支那人同漢族人，教導佢哋要效忠佢哋嘅乜國物國而唔係支那，因為，支那經已係一個歷史名詞，支那已經唔存在喇；宣布以其首都方音為佢哋乜國物國嘅國語，並以其首都方音創製佢哋本土嘅拉丁化文字，全面廢止北平音漢語同支那式方塊文字，有步驟噉開展將佢哋乜國物國嘅重要漢文文獻同漢文檔案作本土拉丁化文字轉譯，然之後，將所有存世嘅漢文書籍、報刊全數銷毀，嚟次當世版嘅“焚書坑儒”，務求喺諸衛星國裡頭徹底滅絕漢文漢字！從而為各國嘅去支那化行動奠定堅穩嘅基石；兼且大力引進基督、天主、藏佛、東正、神道、回教等外域宗教入東亞大陸，禁止儒道同漢地大乘佛教宣教佈道，要以徵稅嘅經濟手段嚟強制民眾皈依基督、天主、藏佛、東正、神道、回教，以官方明撐嘅方式（諸如高調宣布某教係國教）嚟增強呢啲宗教嘅社團力量，以削弱支那傳統式嘅宗族同祖先崇拜。以上語言、文字、宗教等多方面嘅舉措，顯然可以大為增強東亞大陸嘅多元化色彩，兼使支那味大幅削減。

十雄連同呢啲衛星國，共同成立東亞大陸會議組織，以維繫東亞大陸嘅政治均勢，嚴防普魯士式嘅軍國主義政治實體喺大陸出現。我深信，好似拼盤一樣五顏六色嘅東亞大陸政治地圖，一定會喺未來出現，並將長久維持。

裂支，顯然係東亞中亞東南亞環支那邊緣諸國嘅共同願望。粵、臺、閩、吳、圖博、東土、蒙、滿洲同日、韓、越南、緬甸、菲律賓、哈薩克一樣，冇人想有隻巨無霸喺自己側近，粵國嘅生存威脅要徹底解除，必先滅支！

滅支，就係要滅亡支那！同友邦一齊瓜分支那！無論係共產黨統治嘅支那，抑或係國民黨統治嘅支那，又或者共產黨之後由某某漢撈政黨統治嘅支那，對我哋大粵嚟講，都係敵人！都係敵國！

顯然，大粵民進社嘅同志喺呢一點上高，立場並唔鐵決！我可以好唔客氣噉講，呢位撰文嘅同志對支那舊國仲抱有眷戀情懷！支根仲未盡除！

對現時共產支那元素係要徹底、狼狠噉清！但係，對支那舊國，亦即係國民黨支那餘孽，亦絕唔可以養奸！睇睇現時竊居喺臺島嘅國民黨支那餘孽：臺灣撈所做嘅勾當，妳就會把幾火，明目張膽噉去北平朝聖，同大陸撈眉目傳情賣臺！同樣道理，有粵人對“民主化”之後嘅後共產黨時代嘅支那抱有幻想，呢樣嘢對粵獨其實非常危險！支那民主亦都係佢哋漢族人裡頭嘅民主，關我哋粵族人咩事？妳話“民主”咗支那有冇可能主動噉放棄兩廣海南，順順攤攤噉畀我哋粵國獨立呢？假如妳係傻仔，妳可能會話會。英國，係現代民主政治嘅鼻祖同模板，當年大英帝國，對內唔可以話唔民主，之但係佢有冇對佢廣大嘅殖民地廣施仁厚，主動噉放生佢哋呢？一個都冇！所以話，唔靠我哋自己去奮鬥，而去指望“民主”支那嘅施舍，簡直係無知同愚蠢至極。

香港同澳門嘅問題，一早講過喇，佢哋自己獨立成國過佢哋自己嘅日子，我哋大粵對佢哋冇領土要求，當然，我哋會喺軍事上庇護佢哋，之但係有一點，就係佢哋絕對唔可以做出有損我粵安全同聲威嘅事。

最後講講投資，我從嚟都唔贊成對支那有過密嘅經濟活動，無論係資源輸入抑或資本輸出，因為噉會造成對支嘅一種經濟依賴。祗要支那一日仲未滅亡，祗要支那一日仲未裂分成N多個國仔，祗要多元多國嘅東亞大陸新格局一日未成形，我哋大粵就唔應該北上進行所謂嘅經濟拓張，而係將佢視為禁地！