左丁山: CY上台難有真普選
左丁山寫「港大學生會有種」，有老友打電話嚟讚好，有讀者來郵大罵「不堪」，指學生會重點應是「反對小圈子選舉」，呢位讀者其實捉錯用神，小圈子選舉固然要反對，但那是現時法律現實，小圈子明日選特首，具法律實效，反對無用，但不管小圈子選舉還是2017年特首普選，黑金政治仍會發生。今年香港大學學生會痛斥小圈子選舉之黑金政治，會產生長遠影響，對阻止2017年普選時之黑金政治，有一定作用，在任何時候反對有表面證據之黑金政治，都係應該支持嘅。
2017年特首普選，是否真普選，還是有條件有限制的普選？呢樣嘢要密切留意，任何選舉形式，須由政府提出（政制及內地事務局局長），經行政長官及行政會議同意，再交立法會通過，條路不易走。開始第一步要由政府主動──即係行政長官話事。好嘞，
三位候選人之中，何俊仁冇希望當選，在梁振英唐英年之中揀一位，你認為邊一位會真正願意爭取雙普選？爭取真正開放嘅雙普選？從選委論壇答問可見，唐英年承諾爭取雙普選毫不含糊，但梁振英就一貫咁遊花園，含含糊糊，答咗等於冇答，而且佢記憶力驚人，背誦公關人員一早寫好之line to take十分暢順，次次一樣，唔似得唐英年咁樣甩甩漏漏。
聽其言，觀其身體動作，大家應體察到唐英年講真心話，梁振英背標準答案，一啲承諾都冇，各位爭取真正開放式特首普選呀，如果明日選委屈服於劉延東及中聯辦壓力之下，選出阿振英哥做特首，恐怕緣木求魚咯。經過今年一役，到咗2017再選特首，候選人入閘條件一定好嚴苛，連唐英年呢類人都未必入到閘！
梁先生在立法會回答西九利益衝突問題，俾黃毓民指為「三不」（不知道、不明白、不記得），遊完花園再做三不，議員吹佢唔脹，可見梁生之厲害，唔怪得「蘋果」蘋論，質疑一位失憶證人，點可以做特首？騎騎，盧峯有所不知啦，一位梁生嘅「朋友」（唔知梁生認唔認）講，梁生素來心思縝密，記憶力驚人，可以記得四日前開會坐佢對面嘅人士之茶杯係乜嘢顏色呀！
-------------------
http://1in99percent.blogspot.com/2012/0 ... _7358.html